ikhwan

بسملة الرنتيسي




سألتنا إحدى صديقات جنات اسمها الوردة الجميلة: الموضوع كله إني حبيت زميل ليا في الكلية وهو كمان قال لي انه بيحبني وجه مرة واحدة قال لي إحنا مش هننفع لبعض لأننا في السن واحد ومش عايز أظلمك معايا طبعا اتصدمت وجاتلي عقدة ولما قال لي كده كنا في فترة الأجازة ولما رجعنا ثاني للدراسة اكتشفت انه راح لواحدة زميلتي ثانية وقالها انه بيحبها وهو عارف إنها بتحب واحد ثاني وهي طبعا قالت له خلينا أصدقاء أحسن طبعا دي كانت صدمة اكبر لأنه بالرغم من انه قال لي انه خلاص مش بيحبني بس كانت كل تصرفاته بتقول انه بيحبني وانه ندمان والمشكلة إن كل ما ادخل المدرج ألاقي اسمه وجنبه أول حرف من اسمي وقلوب وقصا يد حزينة وكل شوية عينه عليا حتى أصحابي لاحظوا كده وانا مش عارفة اعمل إيه


وكان الرد كالتالي

حبيبتي..الوردة الجميلة ( اسمك جميل جدا)

اسمحي لي أن أرد على كل جملة في كلامك وده من باب الأمانة في ردي عليكي , وأنا متأكدة إنك محتاجة رأي صريح وفي نفس الوقت يحس بيكي.



حبيبتي...الحب من أهم الأشياء التي يعيش بها الإنسان, كل حب في حياتنا له أهميته وقلوبنا كلنا محتاجة لكل أنواع الحب , أنا مش هقولك الحب يكون لوالدك ووالدتك بس, لا , الميل للجنس الآخر ده شيء من فطرة الإنسان وخصوصا في مرحلة الجامعة , لأن السن ده هو السن اللي بننقتح فيه على عالم آخر مليء بالشباب, وأكثر شيء يشغل أي واحدة مننا في السن ده هو فارس الأحلام, اللي بيخاف عليا وينظر إلي نظرات إعجاب, ويا سلام لو الدنيا مطرت لازم هيخلع الجاكيت ويغطيني به....

دي صورة جميلة بنتخيلها كلنا...وأنتي مش غلطانة إنك تقولي بحب فلان...بس آخر الحب ده إيه؟؟

ده أول سؤال لازم نسأله لنفسنا لو فكرنا نفتح قلبنا ونبدأ قصة حب... (ده لو عايزنها تستمر).



حبيبتي بتقولي انه قال لكي إننا مش هننفع لبعض عشان إحنا أد بعض في السن...هو الموضوع ده ماكنش معروف وواضح من بداية علاقتكم!!!!ولا هو خد باله فجأة من موضوع السن ده!!!

أنا شايفة إن ده مش سبب مقنع أبدا...ولا أنتي إيه رأيك؟؟

واللي بيحب حد بصدق لا يشغله سن ولا شكل ولا عائلة ولا....ولا أي شيء غير أنه يرتبط بحبيبه.

وقولتلي بعد الأجازة راح لوحدة تانية...الموضوع شكله تسلية مش مسألة حب وارتباط زي ما أنتي فاكرة.

وطبعا دي حاجة توضحلك أخلاقه..والحمد لله.. قولي الحمد لله معايا...كده ربنا بيحبك..عشان وضح لكي حقيقته بدري قبل ما كان حصل ارتباط وهمي, أو اتعلقتي به أكثر من كده.

وراح يحب واحدة بتحب واحد وعمل كذا...وكذا...وكذا....أنتي حبتيه إزاي ده....ده الواضح إنه شخص ما عندوش أخلاق وبيتسلى بالبنات وبس.

لو فكرتي لدقائق بعقلك هتقدري تحكمي على العلاقة دي وعلى الشخص ده...

مش عايزاكي تزعلي بس أنتي عشان بتحبيه مستسلمة لمشاعرك ومشفقة عليه ومصدقة لتعبيراته ونظراته اللي مستحيل تكون حقيقية...ده كان لسة بيقول لواحدة تانية بحبك...

أنا حاسة بيكي جدا وإنك ممكن تكوني لسة ما لحقتيش تنسيه بس ما ينفعش الحب ده يكمل...مش ده الشخص المناسب..اللي قلبك محتاجه., ولو هو ندم وعايز يرجعلك تاني يبقي يدخل البيت من بابه ويروح يتعرف على والدك وتبقى علاقتكم واضحة ومحددة..وأكيد والدك نظرته أوسع واكبر منك.



حبيبتي أنا كنت بفكر معاكي بصوت عالي, ويارب تكوني ارتحتي شوية.

وأخيرا... أحب أفكرك إن ربنا أكيد مش راضي عن العلاقة دي وأكيد في البيت ما يعرفوش عنها حاجة ودي تعتبر خيانة لربنا قبل ما تكون خيانة لهم...هم أكيد يحبوا يشوفوكي مبسوطة وسعيدة لكن مش الشكل ده للعلاقة اللي هيفرحك ويفرحنا بيكي.

وربنا عزوجل قال في كتابه" ولا متخذات أخدان" يعني أصدقاء...وأنتي أكيد يهمك رضا ربنا وبالتالي رضا أهلك.



حبيبتي...هقولك حاجة أخيرة..ممكن تكون قاسية شوية ولكن من خوفي عليكي...الشاب اللي بيصاحب بنت بتكون آخر واحدة في حساباته عند الارتباط وكمان عند كل أصحابه اللي عارفين بالعلاقة دي...

حبيبتي...اصبري واقفلي على قلبك الطيب الحنون المرهف الحس (قلب وردة) ....لحد ما يجي ابن الحلال اللي يستاهله ويخبط على الباب...ويقابل والدك وابقي فرحينا....ربنا يفرح قلبك عن قريب جدا جدا بزوج صالح يعوضك عن كل اللي فات..,آمين..آمين..آمين.


0 تعليقات

إرسال تعليق

الاخوان منهج ومهما تختلف الاراء فالله الغاية

الاخوان منهج ومهما تختلف الاراء فالله الغاية